『味遊獅城七十小時....不一樣的伯姑爹』

「天天不等於天天」
按照今天的 Itinerary，散策漫遊完「牛車水」新舊古街後，又是找吃的時間，午餐 Plan 咗去食人氣海南雞飯。拿着好像梅菜一樣的地圖舉頭一看，發現目的地「麥士維熟食中心」就在佛牙寺斜對面，過條馬路就到。

遇上中午食晏時間，熟食中心內人頭湧湧，大都是在附近上班的白領一族，熟食中心內都見人龍處處，排隊買嘢食。＂愛飛的太太＂和我就穿插在人龍之中去尋找目標食店「天天海南雞飯」。兜了兩個圈都唔見，唔通搬咗？最後都找到了，原來這食店是日例假不營業！我的天啊！我們山長水又遠坐了三個幾鐘頭飛機嚟摸門釘！如果唔係日日都做生意就唔好學人叫「天天」吖！好可惡！好失敗！唔關人事，都係怪自己今次無做好功課先！

失落過後，見都重未係好肚餓，加上沒有心情再留低係麥士維這個傷心地（其實這裡好熱好迫至眞！）
心有靈犀，＂愛飛的太太＂和我都異口同聲建議不如先去食「伯姑爹」肉骨茶！無錯，此處不留人，自有留人處，路是人行出來的，凡事都要 Think Different 嘛！立即乘地鐵向「發起人肉骨茶」出發！


「不一樣的伯姑爹」
要數星洲人氣肉骨茶應是連曾特首出訪新加坡時都話要去幫襯的「黄亞細」，而今次我們偏偏選擇了韜哥在日日有食神推介的「發起人肉骨茶」，因該館子做的不是一般有濃厚藥材味的肉骨茶，而是用凊湯餚製，與眾不同。
搭咗一次地鐵，加轉咗一次巴士，問咗一次路，最後去到「發起人肉骨茶」餐館都不差多是下午兩點半，好彩都趕得上在下午三時打洋前抵達。但餐館仍然座無虛席，我們需要稍候片刻才有座位。餐廳內貼有很多東南亞名人及藝人來捧場的照片，真是人氣十足！

這館子已開業三十多年，姓蔡的老板自家研發了潮州式的肉骨茶，排骨是用一字排豬上肉，湯很清甜，用油炸鬼浸湯食，味度更一流。除了肉骨茶，這裡還有鹵水豬手，豬粉腸、豬腰、豬肝、豬肚等小吃。全都是在水準之上。

哈哈！又是增加膽固醇的＂壞＂地方！

「塞翁失海南雞」
品嚐完特色清湯肉骨茶後，便打算乘巴士去VivoCity 行商場。在 Balestier Road 找巴士站時發覺在「發起人」對街正是有很多Blog友都有提及的「黎記海南雞飯」。原先打算去「天天」，所以沒有留意「黎記」的位置，今次悟打悟撞碰上，塞翁失馬，一定要試試！好彩我們的宗旨是少吃多餐，雖然成肚都係肉骨茶，個胃腩重有少少空間放海南雞！嚟新加坡無食過海南雞飯可能會俾人笑呢！
這店除了有全統白滑「海南雞」外，更有「脆皮燒雞」及以新加坡黑醬油炮製的「豉油雞」。我倆共享了一客海南雞套餐當作下午茶，雞油飯有斑蘭葉及蒜頭的濃香，主角雞肉都幾嫩滑，配上黑醬酒、薑及辣醬，都尚算及格，但碗湯就真係好＂例＂吓，有很多改善的空間。

可惜未能一試「天天」的出品作個比較，總括「黎記雞飯店」都不過不失，而且這裡有冷氣歎，唔駛食到身水身汗，去開對面街食肉骨茶，都不妨過來小試！

兩隻胃食貓食到咁飽，真真要去行街街逛逛商場，幫助消化！VivoCity....我來了！